കോഴിക്കോട് : (truevisionnews.com) പേരാമ്പ്രയില്‍ മാരക ലഹരി മരുന്നായ എംഡിഎംഎ യുമായി യുവാവ് പിടിയിൽ . കൂത്താളി സ്വദേശി ചെമ്പോടന്‍ പൊയില്‍ അനസാണ് പിടിയിലായത് .അനസിന്റെ വീട്ടിൽ സൂക്ഷിച്ച 3.096 ഗ്രാം എംഡിഎംഎയാണ് പൊലീസ് പിടികൂടിയത്
കൂത്താളി, കടിയങ്ങാട്, പേരാമ്പ്ര, കുറ്റ്യാടി പ്രദേശങ്ങളില്‍ ലഹരി ഉപയോക്താക്കള്‍ക്ക് പ്രതി വലിയ തോതില്‍ ലഹരി വിതരണം ചെയ്തു വരുന്നതായി പൊലീസിന് വിവരം ലഭിച്ചിരുന്നു. തുടര്‍ന്ന് പ്രതിക്കായി പൊലീസ് വലവിരിക്കുകയായിരുന്നു. ഇയാളുടെ അടുത്ത സുഹൃത്ത് കരുവണ്ണൂര്‍ സ്വദേശി റിസ്വാന്‍ എന്നയാളെ 70 ഗ്രാം എംഡിഎംഎ യുമായി കഴിഞ്ഞ ദിവസം പേരാമ്പ്ര പൊലീസ് പിടികൂടിയിരുന്നു .
.gif)
പ്രതി അനസിന് റിസ്വാന്‍ വലിയ അളവില്‍ എംഡിഎംഎ വില്‍പനക്കായി നല്‍കിയ വിവരം പൊലീസിനു ലഭിച്ചിരുന്നു. അനസ് യുവാക്കള്‍ക്കും പെണ്‍കുട്ടികള്‍ക്കും എംഡിഎംഎ വില്‍ക്കാറുണ്ടെന്നും ഇയാളുടെ കൈവശം വില്‍പനക്ക് തയ്യാറാക്കിവെച്ച എംഡിഎംഎ ഉണ്ടെന്നുമുള്ള രഹസ്യവിവത്തെ പരിശോധന നടത്തുകയായിരുന്നു.
പേരാമ്പ്ര ഡിവൈഎസ്പി സുനില്‍ കുമാറിന്റെ നേതൃത്വത്തില്‍ ലഹരി വിരുദ്ധ സ്‌ക്വാഡും ജില്ലാ ലഹരി വിരുദ്ധ സ്‌ക്വാഡംഗങ്ങളും പേരാമ്പ്ര ഇന്‍സ്‌പെക്ടര്‍ ജംഷീദിന്റെ നിര്‍ദ്ദേശപ്രകാരം പേരാമ്പ്ര എസ്‌ഐ ഷാജിയുടെ നേതൃത്വത്തിലുള്ള പൊലീസും ചേർന്നാണ് പരിശോധന നടത്തിയത്.
പൊലീസ് ഒരു മാസമായി ഇയാളെ നിരീക്ഷിച്ചു വരികയായിരുന്നു. പ്രതിയെ കോടതിയില്‍ ഹാജരാക്കുമെന്നും ലഹരിക്കെതിരെ ശക്തമായ നടപടികള്‍ സ്വീകരിക്കുമെന്നും പേരാമ്പ്ര ഡിവൈഎസ്പി അറിയിച്ചു.
youth arrested drug MDMA perambra.
