---
title: "'കഴുത്തിൽ തോർത്തുമുണ്ട് മുറുക്കി ഭർത്താവിനെ കൊന്ന് ഒന്നുമറിയാത്തതുപോലെ പൊട്ടിക്കരഞ്ഞു'; പയ്യാവൂർ കൊലക്കേസിൽ ഭാര്യയ്ക്കും ആൺസുഹൃത്തിനും ജീവപര്യന്തം തടവ്"
english_title: "Payyavoor Murder Case: Wife and Male Friend Sentenced to Life Imprisonment"
publisher: "truevisionnews.com"
canonical_url: "https://truevisionnews.com/news/392353/payyavoor-murder-case-life-imprisonment"
published_at: "2026-11-19T21:58:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6aff24328fb69_payyavoor-murder-case-life-imprisonment.jpg"
keywords: ["KeralaCrime", "MurderCase", "LifeImprisonment", "CourtVerdict"]
---

# 'കഴുത്തിൽ തോർത്തുമുണ്ട് മുറുക്കി ഭർത്താവിനെ കൊന്ന് ഒന്നുമറിയാത്തതുപോലെ പൊട്ടിക്കരഞ്ഞു'; പയ്യാവൂർ കൊലക്കേസിൽ ഭാര്യയ്ക്കും ആൺസുഹൃത്തിനും ജീവപര്യന്തം തടവ്

> **Lead Summary:** കണ്ണൂർ: കണ്ണൂർ പയ്യാവൂരിൽ ഭർത്താവിനെ കഴുത്തിൽ തോർത്തുമുണ്ടു മുറുക്കി കൊലപ്പെടുത്തിയ കേസിൽ ഭാര്യയ്ക്കും ആൺസുഹൃത്തിനും ജീവപര്യന്തം തടവും ഒന്നര ലക്ഷം രൂപ പിഴയും ശിക്ഷ. പയ്യാവൂർ സ്വദേശി ജാൻസി, സുഹൃത്ത് ജോബി ജയിംസ് എന്നിവരെയാണ് തലശ്ശേരി അഡീഷണൽ സെഷൻസ് കോടതി ശിക്ഷിച്ചത്.

## Article Content

കണ്ണൂർ: കണ്ണൂർ പയ്യാവൂരിൽ ഭർത്താവിനെ കഴുത്തിൽ തോർത്തുമുണ്ടു മുറുക്കി കൊലപ്പെടുത്തിയ കേസിൽ ഭാര്യയ്ക്കും ആൺസുഹൃത്തിനും ജീവപര്യന്തം തടവും ഒന്നര ലക്ഷം രൂപ പിഴയും ശിക്ഷ. പയ്യാവൂർ സ്വദേശി ജാൻസി, സുഹൃത്ത് ജോബി ജയിംസ് എന്നിവരെയാണ് തലശ്ശേരി അഡീഷണൽ സെഷൻസ് കോടതി ശിക്ഷിച്ചത്.

2017 നവംബർ എട്ടിനാണ് തോണിപ്പാറക്കൽ ബാബുവിനെ ഭാര്യയും ആൺസുഹൃത്തും കൊലപ്പെടുത്തിയത്. ബാബുവിനെ കൊലപ്പെടുത്തിയ ശേഷം ഒന്നുമറിയാത്ത പോലെ ജാൻസി നിലവിളിച്ചു കരഞ്ഞു. രാവിലെ 7 മണിക്ക് ജാൻസിയുടെ കരച്ചിൽ കേട്ട് അയൽവാസികൾ ഓടിയെത്തുമ്പോൾ ഭർത്താവ് ബാബു ഹാളിലെ കട്ടിലിൽ മരിച്ചുകിടക്കുന്ന നിലയിലാണ് കണ്ടത്.

അസ്വാഭാവിക മരണത്തിന് അന്ന് ആദ്യം കേസെടുത്തു. പോസ്റ്റുമോർട്ടം റിപ്പോർട്ടിലാണ് മരണകാരണം വ്യക്തമായത്. പരിയാരം മെഡിക്കൽ കോളജിലാണ് ബാബുവിന്റെ മൃതദേഹം പോസ്റ്റുമോർട്ടം ചെയ്തത്. പോസ്റ്റുമോർട്ടം ചെയ്ത ഡോ. ഗോപാലകൃഷ്ണപ്പിള്ളയുടെ റിപ്പോർട്ടിൽ ഇത് കൊലപാതകമാണെന്ന് കണ്ടെത്തി.

കഴുത്തിൽ മുണ്ടു മുറുകിയതാണ് വ്യക്തമായതോടെ അസ്വാഭാവിക മരണമെന്ന കേസ് കൊലക്കേസായി. ജാൻസിയും ഓട്ടോഡ്രൈവറായിരുന്ന ജോബി ജയിംസും തമ്മിലുള്ള ബന്ധം എതിർത്തതിലുള്ള വിരോധമാണ് കൊലയ്ക്ക് കാരണം. ഇരുവരും ചേർന്നാണ് ബാബുവിനെ കൊലപ്പെടുത്തിയതെന്നാണ് പ്രോസിക്യൂഷൻ കേസ്.

മറ്റു ദൃക്സാക്ഷികളൊന്നുമില്ലാതിരുന്ന കേസിൽ ശാസ്ത്രീയ തെളിവുകളെയും സാഹചര്യതെളിവുകളെയും ആശ്രയിച്ചാണ് പ്രോസിക്യൂഷൻ കേസ് തെളിയിച്ചത്. അമ്മയ്ക്ക് സുഖമില്ലാത്തതിനാൽ സംഭവത്തിന് തലേദിവസം ജാൻസി 40 കിലോമീറ്റർ അകലെയുള്ള സ്വന്തം വീട്ടിലേക്ക് പോയിരുന്നുവെന്നും വീട്ടിലുണ്ടായിരുന്നില്ലെന്നുമായിരുന്നു പ്രതിഭാഗം വാദം.

ഗതാഗത സൗകര്യം തീരെ പരിമിതമായ സ്ഥലത്ത് നിന്ന് ഇത്രയും ദൂരം സഞ്ചരിച്ചു രാവിലെ 7 മണിക്ക് വീട്ടിലെത്താൻ കഴിയില്ലെന്ന് പ്രോസിക്യൂഷൻ ചൂണ്ടിക്കാട്ടി. ജോബി ജയിംസിനെ അറിയില്ലെന്നായിരുന്നു മറ്റൊരു വാദം.

എന്നാൽ ഇരുവരും ഒരുമിച്ചിരിക്കുന്ന ഫോട്ടോ ഹാജരാക്കിയ പ്രോസിക്യൂഷൻ ഫോട്ടോ എടുത്ത സ്റ്റുഡിയോ ഉടമയെയും കോടതിയിൽ സാക്ഷിയായി വിസ്തരിച്ച് ഈ വാദവും തെറ്റാണെന്ന് തെളിയിച്ചു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ കെ. അജിത്ത്കുമാറും അഡ്വ. ഇ. ജയറാംദാസും ഹാജരായി.

A Thalassery Additional Sessions Court sentenced Payyavoor resident Jansy and her friend Joby James to life imprisonment and a fine of ₹1.5 lakh each for murdering her husband Babu in 2017. The prosecution proved the case through scientific and circumstantial evidence, including postmortem findings that established strangulation as the cause of death.

### Related Links & Sources
- [Original Story Source](https://truevisionnews.com/news/392353/payyavoor-murder-case-life-imprisonment)