---
title: "ഫോട്ടോ ആക്സസ് കൊടുത്താൽ ഫോണിലെ മുഴുവൻ ചിത്രങ്ങളും ആപ്പ് കാണുമോ, മെറ്റയ്ക്ക്  8300 കോടി പിഴ"
english_title: "Meta fined €805 million over photo access privacy gap"
publisher: "truevisionnews.com"
canonical_url: "https://truevisionnews.com/news/392035/meta-photo-access-privacy-fine"
published_at: "2026-11-17T21:12:00+05:30"
category: "Tech-Info"
language: "ml"
image: "https://cf.zdn.im/img/truevisionnews.com/0/image-uploads/6afc77165ffd1_meta-photo-access-privacy-fine.jpg"
keywords: ["Meta", "DataPrivacy", "AppPermissions", "AndroidPrivacy", "ItalyFine"]
---

# ഫോട്ടോ ആക്സസ് കൊടുത്താൽ ഫോണിലെ മുഴുവൻ ചിത്രങ്ങളും ആപ്പ് കാണുമോ, മെറ്റയ്ക്ക്  8300 കോടി പിഴ

> **Lead Summary:** ന്യൂഡൽഹി: ഫോട്ടോ ആക്സസ് അനുമതി നൽകിയാൽ ഫോണിലെ മുഴുവൻ ചിത്രങ്ങളും വീഡിയോകളും ആപ്പിന് കാണാനാകുമോ എന്ന ചോദ്യമാണ് മെറ്റയ്ക്കെതിരായ ഇറ്റലിയുടെ നടപടിയോടെ വീണ്ടും ഉയർന്നിരിക്കുന്നത്. ആൻഡ്രോയിഡ് ഉപയോക്താക്കളുടെ ഫോട്ടോകളും വീഡിയോകളും അനുബന്ധ വിവരങ്ങളും വ്യക്തമായ സമ്മതമില്ലാതെ ഉപയോഗിച്ചെന്ന കണ്ടെത്തലിനെത്തുടർന്ന് ഇറ്റലിയുടെ ഡാറ്റ പ്രൊട്ടക്ഷൻ അതോറിറ്റി മെറ്റയ്ക്ക് 805 മില്യൺ യൂറോ, ഏകദേശം 8300 കോടി രൂപ, പിഴ ചുമത്തി.

## Article Content

ന്യൂഡൽഹി: ഫോട്ടോ ആക്സസ് അനുമതി നൽകിയാൽ ഫോണിലെ മുഴുവൻ ചിത്രങ്ങളും വീഡിയോകളും ആപ്പിന് കാണാനാകുമോ എന്ന ചോദ്യമാണ് മെറ്റയ്ക്കെതിരായ ഇറ്റലിയുടെ നടപടിയോടെ വീണ്ടും ഉയർന്നിരിക്കുന്നത്. ആൻഡ്രോയിഡ് ഉപയോക്താക്കളുടെ ഫോട്ടോകളും വീഡിയോകളും അനുബന്ധ വിവരങ്ങളും വ്യക്തമായ സമ്മതമില്ലാതെ ഉപയോഗിച്ചെന്ന കണ്ടെത്തലിനെത്തുടർന്ന് ഇറ്റലിയുടെ ഡാറ്റ പ്രൊട്ടക്ഷൻ അതോറിറ്റി മെറ്റയ്ക്ക് 805 മില്യൺ യൂറോ, ഏകദേശം 8300 കോടി രൂപ, പിഴ ചുമത്തി.

2023-ൽ ഫെയ്സ്ബുക്ക് അവതരിപ്പിച്ച ഗെറ്റ് സജഷൻസ് ഫ്രം ഗാലറി എന്ന ഫീച്ചറാണ് നടപടിക്ക് കാരണമായത്. ഫോണിലെ ഗാലറിയിലുള്ള ചിത്രങ്ങളും വീഡിയോകളും പോസ്റ്റ് ചെയ്യാൻ നിർദേശിക്കുന്ന സംവിധാനമാണിത്. ചിത്രങ്ങൾ അപ്‌ലോഡ് ചെയ്യാനും ഗാലറി നിർദേശങ്ങൾ നൽകാനും ഒരേ ആൻഡ്രോയിഡ് അനുമതി ഉപയോഗിച്ചെങ്കിലും, രണ്ടാമത്തെ ഉപയോഗം ഉപയോക്താവിനോട് വ്യക്തമായി വിശദീകരിച്ചില്ലെന്നാണ് റെഗുലേറ്ററുടെ കണ്ടെത്തൽ.

ഈ ഫീച്ചർ ഡിഫോൾട്ടായി പ്രവർത്തനക്ഷമമായിരുന്നുവെന്നും അനുമതി നൽകിയാൽ മീഡിയ ലൈബ്രറിയിലെ മുഴുവൻ ഉള്ളടക്കവും ആപ്പിന് പരിശോധിക്കാനാകുമായിരുന്നുവെന്നും അതോറിറ്റി പറഞ്ഞു. ഇറ്റലിയിൽ ഏകദേശം രണ്ട് കോടി ആൻഡ്രോയിഡ് ഉപയോക്താക്കളെ ഇത് ബാധിച്ചതായും റിപ്പോർട്ടുണ്ട്. 60 ദിവസത്തിനകം ഫീച്ചർ ഡിഫോൾട്ടായി ഓഫ് ചെയ്യാനും പ്രത്യേക സമ്മതം തേടാനും മെറ്റയോട് ഇറ്റാലിയൻ അതോറിറ്റി നിർദേശിച്ചിട്ടുണ്ട്. എന്നാൽ ഇതിനെതിരെ അപ്പീൽ നൽകുമെന്ന് മെറ്റ അറിയിച്ചു.

ഒരു ചിത്രം മാത്രമല്ല, മുഴുവൻ ഗാലറിയും

ഫോട്ടോ ആക്സസ് അനുമതി എന്നത് ഒരു ചിത്രം മാത്രം തിരഞ്ഞെടുക്കാനുള്ള അവകാശമല്ലെന്ന് വിദഗ്ധർ ഓർമ്മിപ്പിക്കുന്നു. നൽകിയ അനുമതിയുടെ സ്വഭാവമനുസരിച്ച് ആപ്പിന് ഫോണിലെ മുഴുവൻ ചിത്രങ്ങളും വീഡിയോകളും വായിക്കാനായേക്കാം. എന്നാൽ ആൻഡ്രോയിഡ് 14-ലെ സെലക്ടഡ് ഫോട്ടോസ് ആക്സസ്, ഗൂഗിളിന്റെ ഫോട്ടോ പിക്കർ എന്നിവയിലൂടെ തിരഞ്ഞെടുത്ത ചിത്രങ്ങൾ മാത്രം പങ്കുവയ്ക്കാനും കഴിയും. ഐഫോണിലും സമാന നിയന്ത്രണങ്ങളുണ്ട്.

അനുമതി കൊടുത്താൽ സമ്മതം പൂർണമാകുമോ

പെർമിഷൻ നൽകിയാൽ സമ്മതം പൂർണമാകുമോ എന്ന ചോദ്യത്തിനും ഉത്തരമില്ലെന്നാണ് റിപ്പോർട്ട് പറയുന്നത്. ഓപ്പറേറ്റിങ് സിസ്റ്റം നൽകുന്ന അനുമതി ആപ്പിന് ഫോണിൽ എന്തൊക്കെ പരിശോധിക്കാമെന്നതിനെക്കുറിച്ചാണ് പറയുന്നത്. ശേഖരിച്ച വിവരങ്ങൾ എങ്ങനെ ഉപയോഗിക്കും, പരസ്യ-അനലിറ്റിക്സ് സേവനങ്ങളുമായി പങ്കുവയ്ക്കുമോ തുടങ്ങിയ കാര്യങ്ങൾ അതിൽ വ്യക്തമാകില്ല. അനുമതി പിൻവലിച്ചാലും നേരത്തെ ശേഖരിച്ചതോ മറ്റുള്ളവരുമായി പങ്കുവെച്ചതോ ആയ വിവരങ്ങൾ സ്വയം ഇല്ലാതാകില്ലെന്നും പറയുന്നു.

ഇന്ത്യൻ ഉപയോക്താക്കൾക്ക് മുന്നറിയിപ്പ്

ഇന്ത്യൻ ഉപയോക്താക്കൾക്കും ഇതിൽ നിന്ന് മുന്നറിയിപ്പുണ്ട്. ഇന്ത്യയുടെ ഡിജിറ്റൽ പേഴ്സണൽ ഡാറ്റ പ്രൊട്ടക്ഷൻ നിയമപ്രകാരം സമ്മതം സ്വതന്ത്രവും വ്യക്തവും അറിവോടെയുള്ളതുമായിരിക്കണം. എന്നാൽ ഇതിന്റെ പ്രധാന സമ്മത വ്യവസ്ഥകൾ 2027 മേയ് 13-നാണ് പ്രാബല്യത്തിൽ വരുന്നത്. അതുവരെ ഓരോ ആപ്പിന്റെയും പെർമിഷനുകൾ സ്വയം പരിശോധിച്ച് ആവശ്യത്തിന് മാത്രം ആക്സസ് അനുവദിക്കണമെന്ന് വിദഗ്ധർ പറയുന്നു. ഫോണിൽ അനുവദിക്കുക അമർത്തുന്നത് വിവരങ്ങളുടെ എല്ലാ ഉപയോഗങ്ങൾക്കുമുള്ള പൂർണ സമ്മതമായി കണക്കാക്കാനാകില്ലെന്നും മുന്നറിയിപ്പുണ്ട്.

### Related Links & Sources
- [Original Story Source](https://truevisionnews.com/news/392035/meta-photo-access-privacy-fine)