---
title: "പയ്യോളി പോക്സോ കേസിൽ നിർണായക വഴിത്തിരിവ്; ഒന്നാം പ്രതി അബ്ദുൾ റഫീഖിനെ കൊയിലാണ്ടി പോലീസ് കസ്റ്റഡിയിലെടുത്തു, നടപടി ജാമ്യം റദ്ദാക്കിയതിനെതിരെ പ്രതി കോടതിയിൽ സമർപ്പിച്ച ഹർജി തള്ളിയതോടെ"
english_title: "Payyoli POCSO Case Takes Turn; Prime Accused Abdul Rafeeq Taken Into Custody"
publisher: "truevisionnews.com"
canonical_url: "https://truevisionnews.com/news/390174/payyoli-pocso-case-prime-accused-custody"
published_at: "2026-11-04T12:42:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6addb16257739_bail-cancelled-minor-girl-abuse-case.jpg"
keywords: ["POCSOCase", "KeralaPolice", "KoyilandyPolice", "PayyoliCase", "CriminalJustice"]
---

# പയ്യോളി പോക്സോ കേസിൽ നിർണായക വഴിത്തിരിവ്; ഒന്നാം പ്രതി അബ്ദുൾ റഫീഖിനെ കൊയിലാണ്ടി പോലീസ് കസ്റ്റഡിയിലെടുത്തു, നടപടി ജാമ്യം റദ്ദാക്കിയതിനെതിരെ പ്രതി കോടതിയിൽ സമർപ്പിച്ച ഹർജി തള്ളിയതോടെ

> **Lead Summary:** കോഴിക്കോട്: വിവാദമായ പയ്യോളി പോക്‌സോ കേസിലെ ഒന്നാം പ്രതി അബ്ദുൾ റഫീഖിനെ കൊയിലാണ്ടി പോലീസ് കസ്റ്റഡിയിലെടുത്തു. ജാമ്യം റദ്ദാക്കിയതിനെതിരെ പ്രതി കോടതിയിൽ സമർപ്പിച്ച ഹർജി തള്ളിയതോടെയാണ് ബുധനാഴ്ച പത്തരയോടെ ഇയാളെ കസ്റ്റഡിയിലെടുത്തത്.

## Article Content

കോഴിക്കോട്: വിവാദമായ പയ്യോളി പോക്‌സോ കേസിലെ ഒന്നാം പ്രതി അബ്ദുൾ റഫീഖിനെ കൊയിലാണ്ടി പോലീസ് കസ്റ്റഡിയിലെടുത്തു. ജാമ്യം റദ്ദാക്കിയതിനെതിരെ പ്രതി കോടതിയിൽ സമർപ്പിച്ച ഹർജി തള്ളിയതോടെയാണ് ബുധനാഴ്ച പത്തരയോടെ ഇയാളെ കസ്റ്റഡിയിലെടുത്തത്.

പയ്യോളിയിൽ 13കാരിയെ ലൈംഗികമായി പീഡിപ്പിച്ച കേസിലെ ഒന്നാം പ്രതി അബ്ദുൾ റഫീഖ് അറസ്റ്റിലാവാതെ ജാമ്യത്തിലിറങ്ങിയ സംഭവം വലിയ വിവാദമായിരുന്നു. ജാമ്യമില്ലാ വകുപ്പുകൾ പ്രകാരം കേസെടുത്തിട്ടും വടകര ചങ്ങരോത്ത് സ്വദേശിയും വ്യവസായിയുമായ അബ്ദുൽ റഫീഖ് ഒരു ദിവസം പോലും പോലീസ് കസ്റ്റഡിയിലാകാതെ പുറത്തിറങ്ങിയിരുന്നു.

സംഭവത്തിൽ ദുരൂഹതയാരോപിച്ച് പെൺകുട്ടിയുടെ കുടുംബവും നാട്ടുകാരും പ്രതിയുടെ വീടിനു മുന്നിൽ പ്രതിഷേധവുമായി രംഗത്തെത്തിയിരുന്നു. ഇരയായ കുട്ടിക്ക് നീതി നിഷേധിക്കപ്പെട്ടെന്നും പോലീസിന്റെ ഭാഗത്തുനിന്നുണ്ടായ ഗുരുതരമായ വീഴ്ചയും നിഷ്‌ക്രിയത്വവുമാണ് പ്രതിക്ക് എളുപ്പത്തിൽ ജാമ്യം ലഭിക്കാൻ വഴിയൊരുക്കിയതെന്നുമാണ് ഉയർന്ന ആരോപണം.

വിവാദം കത്തിയതോടെ പോലീസുകാർക്കെതിരെ നടപടിയും വന്നു. സിഐ ബാബുമോൻ, സിപിഒ അബ്ദുൾ ഹമീദ് എന്നിവരെ സസ്‌പെന്റ് ചെയ്തിരുന്നു.

രണ്ടു വർഷം മുൻപാണ് കേസിനാസ്പദമായ സംഭവം നടന്നത്. സ്വന്തം വീട്ടിൽ വെച്ച് കുട്ടിയുടെ മാതാവിന്റെ സുഹൃത്തായ അബ്ദുൽ റഫീഖ് പെൺകുട്ടിയെ ലൈംഗികമായി പീഡനത്തിനിരയാക്കുകയായിരുന്നു. കുട്ടിയുടെ മാതാവും ഇതിന് കൂട്ടുനിന്നു.

കത്തി കാട്ടി ഭീഷണിപ്പെടുത്തിയും മർദ്ദിച്ചും രണ്ടു വർഷത്തോളമാണ് ഇയാൾ പെൺകുട്ടിയെ ചൂഷണം ചെയ്തത്. കുട്ടി പഠനത്തിൽ ഏറെ പിന്നോക്കം പോയതിനെ തുടർന്ന് സ്‌കൂൾ അധികൃതർ കുട്ടിയെ കൗൺസിലിംഗിന് വിധേയയാക്കിയപ്പോഴാണ് വിവരങ്ങൾ പുറത്തറിയുന്നത്.

സ്‌കൂൾ അധികൃതർ വിവരമറിയിച്ചതിനെ തുടർന്ന് പത്തു മാസം മുൻപ് പയ്യോളി പോലീസ് കേസ് രജിസ്റ്റർ ചെയ്തു. പോക്സോ കേസിൽ അബ്ദുൽ റഫീഖിനെ ഒന്നാം പ്രതിയും കുട്ടിയുടെ മാതാവിനെ രണ്ടാം പ്രതിയുമാക്കി കേസെടുത്തു. തുടർന്ന് മാതാവിനെ പോലീസ് അറസ്റ്റ് ചെയ്ത് റിമാൻഡ് ചെയ്തെങ്കിലും പിന്നീട് ഇവർക്ക് ജാമ്യം ലഭിച്ചു. എന്നാൽ ഒന്നാം പ്രതിയായ അബ്ദുൽ റഫീഖ് ഇതിനിടെ വിദേശത്തേക്ക് കടന്നുകളയുകയായിരുന്നു.

ഇയാൾക്കെതിരെ അബ്സ്‌കൗണ്ടിങ് റിപ്പോർട്ട് തയ്യാറാക്കിയിട്ടുണ്ടെന്നും നെടുമ്പാശ്ശേരി ഉൾപ്പെടെ രാജ്യത്തെ ഏത് വിമാനത്താവളത്തിൽ ഇറങ്ങിയാലും അപ്പോൾ തന്നെ കൈയോടെ അറസ്റ്റ് ചെയ്യുമെന്നുമായിരുന്നു പോലീസ് കുടുംബത്തിന് നൽകിയ ഉറപ്പ്.

എന്നാൽ നെടുമ്പാശ്ശേരി വിമാനത്താവളം വഴി പ്രതി നാട്ടിൽ തിരിച്ചെത്തിയിട്ടും പയ്യോളി പോലീസ് ഇയാളെ കസ്റ്റഡിയിലെടുക്കാനോ ചോദ്യം ചെയ്യാനോ തയ്യാറായില്ലെന്നായിരുന്നു ആരോപണം. തുടർന്ന് പ്രതിയുടെ ജാമ്യം റദ്ദാക്കിയെങ്കിലും ഇതിനെതിരെ പ്രതി പെറ്റീഷൻ നൽകുകയായിരുന്നു.

Police in Koilandy have taken into custody Abdul Rafiq, the first accused in the controversial Payyoli POCSO case, after his petition against the cancellation of bail was dismissed by the court. The case had drawn public outrage over allegations that he remained out on bail without being arrested, while police officers were later suspended over the handling of the investigation.

### Related Links & Sources
- [Original Story Source](https://truevisionnews.com/news/390174/payyoli-pocso-case-prime-accused-custody)