---
title: "തനിക്ക് യാതൊരു അറിവുമില്ല.....: ആ യോഗം 'ഓപ്പറേഷൻ തൂഫാന്റെ' തലയിൽ കെട്ടിവയ്ക്കേണ്ട; സുധാകരന്റെ 'ഗുണ്ടാ യോഗം' തള്ളി മന്ത്രി രമേശ് ചെന്നിത്തല"
english_title: "Minister Ramesh Chennithala rejects meeting called by KSudhakaran"
publisher: "truevisionnews.com"
canonical_url: "https://truevisionnews.com/news/369468/minister-ramesh-chennithala-rejects-meeting-called-by-ksudhakaran-"
published_at: "2026-06-30T14:21:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6a43844337a7d_RAMRSH.jpg"
keywords: ["Ramesh Chennithala", "K Sudhakaran Thoofan meeting", "Thoofan meeting"]
---

# തനിക്ക് യാതൊരു അറിവുമില്ല.....: ആ യോഗം 'ഓപ്പറേഷൻ തൂഫാന്റെ' തലയിൽ കെട്ടിവയ്ക്കേണ്ട; സുധാകരന്റെ 'ഗുണ്ടാ യോഗം' തള്ളി മന്ത്രി രമേശ് ചെന്നിത്തല

> **Lead Summary:** **തിരുവനന്തപുരം: **കെ. സുധാകരൻ എംപി മുൻകൈയെടുത്ത് വിളിച്ചുചേർത്ത 'തൂഫാൻ' യോഗത്തെ പൂർണ്ണമായി തള്ളി ആഭ്യന്തര മന്ത്രി രമേശ് ചെന്നിത്തല. സുധാകരന്റെ നേതൃത്വത്തിൽ നടക്കുന്ന ഇത്തരം യോഗങ്ങളെക്കുറിച്ച് തനിക്ക് യാതൊരു അറിവുമില്ലെന്ന് തിരുവനന്തപുരത്ത് മാധ്യമപ്രവർത്തകരോട് സംസാരിക്കവെ ആഭ്യന്തര മന്ത്രി വ്യക്തമാക്കി.

## Article Content

**തിരുവനന്തപുരം: **കെ. സുധാകരൻ എംപി മുൻകൈയെടുത്ത് വിളിച്ചുചേർത്ത 'തൂഫാൻ' യോഗത്തെ പൂർണ്ണമായി തള്ളി ആഭ്യന്തര മന്ത്രി രമേശ് ചെന്നിത്തല. സുധാകരന്റെ നേതൃത്വത്തിൽ നടക്കുന്ന ഇത്തരം യോഗങ്ങളെക്കുറിച്ച് തനിക്ക് യാതൊരു അറിവുമില്ലെന്ന് തിരുവനന്തപുരത്ത് മാധ്യമപ്രവർത്തകരോട് സംസാരിക്കവെ ആഭ്യന്തര മന്ത്രി വ്യക്തമാക്കി.

കഴിഞ്ഞ ദിവസം എറണാകുളം ഡിസിസിയും തങ്ങളുടെ അറിവോടെയല്ല കെ സുധാകരകൻ എംപി കൊച്ചിയിൽ യോഗം വിളിച്ച് ചേർത്തതെന്ന് വ്യക്തമാക്കിയിരുന്നു. കെ സുധാകരൻ വിളിച്ചുചേർത്ത യോ​ഗത്തെപറ്റി അറിയില്ലെന്ന് വ്യക്തമാക്കി മന്ത്രി രമേശ് ചെന്നിത്തല. ആഭ്യന്തരവകുപ്പ് അങ്ങനെ ഒരു യോഗം കൂടുമെന്ന് എനിക്കറിയില്ല.

ആരുടെ യോഗമാണെന്നോ ആര് വിളിച്ചുചേർത്തെന്നോ അറിയില്ല. ഓപ്പറേഷൻ തൂഫാൻ നടപടികളുടെ യോഗം വിളിക്കാനുള്ള ചുമതല പൊലീസ് ഉദ്യോഗസ്ഥർക്കാണ്. അല്ലാത്ത യോഗങ്ങൾ ഒന്നും ഓപ്പറേഷൻ തൂഫാന്റെ തലയിൽ കെട്ടിവയ്ക്കേണ്ടെന്നും ചെന്നിത്തല മാധ്യമങ്ങളോട് പറഞ്ഞു. സംഭവത്തിൽ ഇതുവരെയും കെ സുധാകരൻ പ്രതികരിച്ചിട്ടില്ല.

ക്രിമിനൽ കേസ് പ്രതികളെയും ഗുണ്ടാ നേതാക്കളേയും പങ്കെടുപ്പിച്ച് കൊണ്ടായിരുന്നു കെ സുധാകരൻ വിളിച്ചുചേർത്ത യോഗം. മട്ടാഞ്ചേരി ഹാരിസ്, തോക്ക് കേസ് പ്രതി റിയാസ്, പുലി നസീർ, ബ്യൂട്ടിപാർലർ വെടിവെപ്പ് കേസിലെ പ്രതി ബിലാൽ തുടങ്ങി ക്രമിനൽ കേസ് പ്രതികളും മുൻ ഗുണ്ടാ നേതാക്കളും യോഗത്തിൽ പങ്കെടുത്തു.

ആഭ്യന്തരവകുപ്പും എക്സൈസ് വകുപ്പും നടപ്പിലാക്കുന്ന ഓപ്പറേഷൻ തൂഫാൻ, ഓപ്പറേഷൻ തണ്ടർ പരിപാടികൾക്ക് പിന്തുണ എന്ന പേരിലാണ് കൊച്ചിയിൽ കൂട്ടായ്മ നടന്നത്. സംസ്ഥാന സർക്കാർ പരിശ്രമങ്ങളുടെ ഭാഗമാകാൻ യോഗത്തിൽ കെ സുധാകരൻ ആവശ്യപ്പെട്ടു. യോഗത്തിന്‍റെ ദൃശ്യങ്ങൾ സമൂഹ മാധ്യമങ്ങളിൽ പ്രചരിച്ചതിന് പിന്നാലെയാണ് കോൺഗ്രസ് നേതാക്കൾക്കിടയിൽ നിന്ന് തന്നെ വിമർശനം ഉയരുന്നത്. നടന്നത് അനൗദ്യോഗിക യോഗം മാത്രമെന്നാണ് സുധാകരനോട് അടുത്ത വൃത്തങ്ങൾ പറയുന്നത്.

### Related Links & Sources
- [Original Story Source](https://truevisionnews.com/news/369468/minister-ramesh-chennithala-rejects-meeting-called-by-ksudhakaran-)