---
title: "ബൈജൂസ് സ്ഥാപകൻ ബൈജു രവീന്ദ്രന് സിംഗപ്പൂരിൽ ആറ് മാസം തടവുശിക്ഷ; ഉടൻ കോടതിയിൽ കീഴടങ്ങാൻ ഉത്തരവ്"
english_title: "content highlights:- Baiju Raveendran sentenced to six months in prison"
publisher: "truevisionnews.com"
canonical_url: "https://truevisionnews.com/news/362041/content-highlights-baiju-raveendran-sentenced-to-six-months-in-prison"
published_at: "2026-05-27T09:48:00+05:30"
category: "National"
language: "ml"
image: "https://cf.zdn.im/img/truevisionnews.com/0/image-uploads/6a1671b2b7ef3_byjus.jpg"
keywords: ["Latest News", "Baiju Raveendran", "Six months in prison", "Court of Singapore"]
---

# ബൈജൂസ് സ്ഥാപകൻ ബൈജു രവീന്ദ്രന് സിംഗപ്പൂരിൽ ആറ് മാസം തടവുശിക്ഷ; ഉടൻ കോടതിയിൽ കീഴടങ്ങാൻ ഉത്തരവ്

> **Lead Summary:** **ദില്ലി: [** പ്രമുഖ ലേണിംഗ് ആപ്പായ ബൈജൂസിന്റെ സ്ഥാപകൻ ബൈജു രവീന്ദ്രന് വൻ തിരിച്ചടിയായി സിംഗപ്പൂർ കോടതിയുടെ തടവുശിക്ഷാ വിധി. ആസ്തി വിവരങ്ങൾ വെളിപ്പെടുത്തുന്നതുമായി ബന്ധപ്പെട്ട കോടതി ഉത്തരവുകൾ തുടർച്ചയായി ലംഘിച്ചതിനും കോടതിയിൽ ഹാജരാകുന്നതിൽ വീഴ്ച വരുത്തിയതിനുമാണ് സിംഗപ്പൂർ കോടതി അദ്ദേഹത്തിന് ആറ് മാസത്തെ തടവുശിക്ഷ വിധിച്ചത്.

## Article Content

**ദില്ലി: [** പ്രമുഖ ലേണിംഗ് ആപ്പായ ബൈജൂസിന്റെ സ്ഥാപകൻ ബൈജു രവീന്ദ്രന് വൻ തിരിച്ചടിയായി സിംഗപ്പൂർ കോടതിയുടെ തടവുശിക്ഷാ വിധി. ആസ്തി വിവരങ്ങൾ വെളിപ്പെടുത്തുന്നതുമായി ബന്ധപ്പെട്ട കോടതി ഉത്തരവുകൾ തുടർച്ചയായി ലംഘിച്ചതിനും കോടതിയിൽ ഹാജരാകുന്നതിൽ വീഴ്ച വരുത്തിയതിനുമാണ് സിംഗപ്പൂർ കോടതി അദ്ദേഹത്തിന് ആറ് മാസത്തെ തടവുശിക്ഷ വിധിച്ചത്.

ശിക്ഷാ വിധിയുടെ പശ്ചാത്തലത്തിൽ ഉടൻ തന്നെ സിംഗപ്പൂരിലെ കോടതിയിൽ കീഴടങ്ങാൻ ബൈജു രവീന്ദ്രനോട് നിർദ്ദേശിച്ചിട്ടുണ്ട്. കൂടാതെ കോടതിച്ചെലവിലേക്കായി 90,000 സിംഗപ്പൂർ ഡോളർ (ഏകദേശം 67.46 ലക്ഷം രൂപ) അടയ്ക്കാനും കോടതി ഉത്തരവിട്ടു.

2024 ഏപ്രിൽ മുതൽ തന്റെ ആസ്തി വിവരങ്ങൾ വെളിപ്പെടുത്താൻ ആവശ്യപ്പെട്ട് കോടതി പുറപ്പെടുവിച്ച പല ഉത്തരവുകളും ബോധപൂർവ്വം അവഗണിച്ചതാണ് ഇപ്പോൾ കടുത്ത നിയമനടപടിയിലേക്ക് നയിച്ചിരിക്കുന്നത്.

ഖത്തർ ഇൻവെസ്റ്റ്‌മെന്റ് അതോറിറ്റിയുടെ ഉപകമ്പനി നൽകിയ പരാതിയുടെ അടിസ്ഥാനത്തിലാണ് സിംഗപ്പൂർ കോടതിയുടെ ഈ നിർണായക ഉത്തരവ്. സിംഗപ്പൂരിലെ 'ബീയാർ ഇൻവെസ്റ്റ്കോ' എന്ന കമ്പനിയിൽ ബൈജു രവീന്ദ്രനുള്ള ഉടമസ്ഥാവകാശം തെളിയിക്കുന്ന രേഖകൾ ഹാജരാക്കാനും കോടതി ആവശ്യപ്പെട്ടിട്ടുണ്ട്.

ആഗോള തലത്തിലെ പ്രമുഖ നിക്ഷേപകരുമായി ബൈജൂസ് കമ്പനി നിലവിൽ നടത്തുന്ന വൻ നിയമയുദ്ധങ്ങളിലെ ഏറ്റവും പുതിയതും കനത്തതുമായ തിരിച്ചടിയാണിത്. അതേസമയം, നിലവിൽ ബൈജു രവീന്ദ്രൻ എവിടെയാണെന്ന കാര്യത്തിൽ വ്യക്തതയില്ലെങ്കിലും അദ്ദേഹം എത്രയും വേഗം സിംഗപ്പൂർ അധികൃതർക്ക് മുന്നിൽ കീഴടങ്ങേണ്ടി വരും.

അന്താരാഷ്ട്ര തലത്തിൽ ബൈജൂസ് നേരിടുന്ന നിയമപ്രശ്നങ്ങൾ സിംഗപ്പൂരിൽ മാത്രം ഒതുങ്ങുന്നതല്ല. അമേരിക്കയിൽ 1.2 ബില്യൺ ഡോളറിന്റെ വായ്പ തിരിച്ചടവുമായി ബന്ധപ്പെട്ട കേസിൽ യുഎസ് കോടതിയും നേരത്തെ ബൈജുവിനെതിരെ രൂക്ഷമായ പരാമർശങ്ങൾ നടത്തിയിരുന്നു.

ഒരു കാലത്ത് ഇന്ത്യൻ സ്റ്റാർട്ടപ്പ് ലോകത്ത് ഏറ്റവും വലിയ മുന്നേറ്റം നടത്തുകയും ആഗോളതലത്തിൽ വൻ പ്രശസ്തി കൈവരിക്കുകയും ചെയ്ത ശേഷമാണ്, നിക്ഷേപകരുമായുള്ള തർക്കങ്ങളും വായ്പാ പ്രതിസന്ധികളും കാരണം ബൈജൂസ് സാമ്രാജ്യം ഇപ്പോൾ വൻ തകർച്ച നേരിടുന്നത്.

### Related Links & Sources
- [Original Story Source](https://truevisionnews.com/news/362041/content-highlights-baiju-raveendran-sentenced-to-six-months-in-prison)