---
title: "ഉറക്കം വിനയായി...! ചുറ്റമ്പലത്തിലെ വാതിൽപൂട്ട് പൊളിക്കുന്നതിനിടെ ക്ഷീണിച്ച് ഉറങ്ങിപ്പോയി, അമ്പലക്കള്ളൻ പിടിയിൽ"
english_title: "Theft at Vellarada temple, thief arrested"
publisher: "truevisionnews.com"
canonical_url: "https://truevisionnews.com/news/352950/theft-at-vellarada-temple-thief-arrested"
published_at: "2026-04-12T07:52:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/69db022d1ed13_arrest.jpg"
keywords: []
---

# ഉറക്കം വിനയായി...! ചുറ്റമ്പലത്തിലെ വാതിൽപൂട്ട് പൊളിക്കുന്നതിനിടെ ക്ഷീണിച്ച് ഉറങ്ങിപ്പോയി, അമ്പലക്കള്ളൻ പിടിയിൽ

> **Lead Summary:** **വെള്ളറട: **ക്ഷേത്രമോഷണത്തിനെത്തിയയാൾ കമ്മിറ്റി ഓഫീസിലിരുന്ന് ഉറങ്ങിപ്പോയതിനെത്തുടർന്ന് പിടിയിലായി. കുടപ്പനമൂട് കോവില്ലൂർ കഴുകാൽവട്ടം ഭഗവതിക്ഷേത്രത്തിലാണ് സംഭവം. ദിണ്ടിക്കൽ സ്വദേശി സെന്തിലാണ് ശനിയാഴ്ച രാവിലെ അറസ്റ്റിലായത്.

## Article Content

**വെള്ളറട: **ക്ഷേത്രമോഷണത്തിനെത്തിയയാൾ കമ്മിറ്റി ഓഫീസിലിരുന്ന് ഉറങ്ങിപ്പോയതിനെത്തുടർന്ന് പിടിയിലായി. കുടപ്പനമൂട് കോവില്ലൂർ കഴുകാൽവട്ടം ഭഗവതിക്ഷേത്രത്തിലാണ് സംഭവം. ദിണ്ടിക്കൽ സ്വദേശി സെന്തിലാണ് ശനിയാഴ്ച രാവിലെ അറസ്റ്റിലായത്.

വെള്ളിയാഴ്ച അർധരാത്രിയോടെ ക്ഷേത്രത്തിലെത്തിയ ഇയാൾ ചുറ്റമ്പലത്തിലെ വാതിൽപൂട്ട് പൊട്ടിക്കാൻ ശ്രമിച്ചെങ്കിലും നടന്നില്ല. പിന്നീട് മുൻവശത്തുള്ള ക്ഷേത്ര കമ്മിറ്റി ഓഫീസിലെ വാതിലിന്‍റെ പൂട്ട് തകർത്ത് അകത്ത് കയറിയ സെന്തിൽ അവിടെയിരുന്ന് ഉറങ്ങുകയായിരുന്നു.

രാവിലെ ക്ഷേത്രപൂജാരിയെത്തിയപ്പോഴാണ് കമ്മിറ്റി ഓഫീസ് തുറന്നുകിടക്കുന്നത് കണ്ടത്. തുടർന്നാണ് അകത്തിരുന്ന് ഉറങ്ങുന്ന മോഷ്ടാവിനെ കണ്ടത്. വിവരമറിഞ്ഞ് കമ്മിറ്റിക്കാരെത്തി വെള്ളറട പോലീസിനെ അറിയിക്കുകയായിരുന്നു. ക്ഷേത്രത്തിൽനിന്ന്‌ ഒന്നും നഷ്ടപ്പെട്ടിട്ടില്ലെന്ന് ഭാരവാഹികൾ പറഞ്ഞു. ഇയാളുടെപേരിൽ സംസ്ഥാനത്ത് കാണിക്കവഞ്ചി കവർച്ചയ്ക്കുൾപ്പെടെ നിരവധി മോഷണക്കേസുകളുണ്ടെന്ന് പോലീസ് പറഞ്ഞു.

### Related Links & Sources
- [Original Story Source](https://truevisionnews.com/news/352950/theft-at-vellarada-temple-thief-arrested)