---
title: "ദുരന്തഭൂമികളും നിഗൂഢതകളും തേടി ഒരു യാത്ര; തരംഗമായി 'ഡാർക്ക് ടൂറിസം'"
english_title: "'Dark tourism' is on the rise"
publisher: "truevisionnews.com"
canonical_url: "https://truevisionnews.com/news/338550/dark-tourism-is-on-the-rise"
published_at: "2026-01-27T15:25:00+05:30"
category: "Travel"
language: "ml"
image: "https://cf.zdn.im/img/truevisionnews.com/0/image-uploads/69788be2eb1af_tru3.jpg"
keywords: []
---

# ദുരന്തഭൂമികളും നിഗൂഢതകളും തേടി ഒരു യാത്ര; തരംഗമായി 'ഡാർക്ക് ടൂറിസം'

> **Lead Summary:** **[[truevisionnews.com]]** സുരക്ഷിതമായ വിനോദസഞ്ചാര കേന്ദ്രങ്ങൾക്കും ആഡംബര യാത്രകൾക്കും അപ്പുറം, ലോകചരിത്രത്തിലെ കറുത്ത ഏടുകളും ദുരന്തഭൂമികളും തേടിപ്പോകുന്ന 'ഡാർക്ക് ടൂറിസം' എന്ന നവീന രീതിക്ക് സഞ്ചാരികൾക്കിടയിൽ പ്രിയമേറുന്നു.

## Article Content

**[[truevisionnews.com]]** സുരക്ഷിതമായ വിനോദസഞ്ചാര കേന്ദ്രങ്ങൾക്കും ആഡംബര യാത്രകൾക്കും അപ്പുറം, ലോകചരിത്രത്തിലെ കറുത്ത ഏടുകളും ദുരന്തഭൂമികളും തേടിപ്പോകുന്ന 'ഡാർക്ക് ടൂറിസം' എന്ന നവീന രീതിക്ക് സഞ്ചാരികൾക്കിടയിൽ പ്രിയമേറുന്നു.

മരണം, കഷ്ടപ്പാടുകൾ, ചരിത്രപരമായ ക്രൂരതകൾ എന്നിവ നടന്ന ഇടങ്ങൾ സന്ദർശിക്കുന്ന ഈ ശൈലി 'ഗ്രീഫ് ടൂറിസം' എന്നും അറിയപ്പെടുന്നു.  പുസ്തകങ്ങളിൽ വായിച്ച ചരിത്രത്തിന്റെ പരുക്കൻ യാഥാർത്ഥ്യങ്ങൾ നേരിട്ട് അറിയാനുള്ള ആഗ്രഹം, സോഷ്യൽ മീഡിയയിലൂടെ നിഗൂഢമായ ഇടങ്ങൾ പങ്കുവെക്കാനുള്ള താല്പര്യം, ഭയവും ആകാംക്ഷയും നിറഞ്ഞ സാഹസികത എന്നിവയാണ് യുവാക്കളെ ഇതിലേക്ക് ആകർഷിക്കുന്ന ഘടകങ്ങൾ.

ഇന്ത്യയിലും ഇത്തരം ഒട്ടേറെ വൈകാരികവും നിഗൂഢവുമായ കേന്ദ്രങ്ങൾ സഞ്ചാരികളെ ആകർഷിക്കുന്നുണ്ട്. ചോരയുറയുന്ന സ്മരണകളുള്ള ജാലിയൻ വാലാബാഗ്, സ്വാതന്ത്ര്യസമര സേനാനികളുടെ യാതനകൾ സാക്ഷ്യം വഹിച്ച ആൻഡമാനിലെ സെല്ലുലാർ ജയിൽ എന്നിവ ചരിത്രപരമായ പ്രാധാന്യമുള്ളവയാണ്. അതോടൊപ്പം തന്നെ നിഗൂഢതകൾ നിറഞ്ഞ രാജസ്ഥാനിലെ ഭാന്‍ഗഢ് കോട്ടയും കുൽധാര ഗ്രാമവും, അസ്ഥികൂടങ്ങളുടെ തടാകമെന്നറിയപ്പെടുന്ന ഉത്തരാഖണ്ഡിലെ രൂപ്കുണ്ഡ്, രാത്രികാലങ്ങളിൽ അസ്വാഭാവിക ശബ്ദങ്ങൾ കേൾക്കുന്ന സൂറത്തിലെ ഡുമാസ് ബീച്ച് എന്നിവയും സാഹസികരായ സഞ്ചാരികളുടെ പ്രധാന കേന്ദ്രങ്ങളാണ്.

ഇത്തരം സ്ഥലങ്ങൾ സന്ദർശിക്കുമ്പോൾ അത് വെറുമൊരു വിനോദമായി കാണാതെ, അവിടുത്തെ വേദന നിറഞ്ഞ ചരിത്രത്തോടും സ്മാരകങ്ങളോടും തികഞ്ഞ ബഹുമാനം പുലർത്തേണ്ടത് അത്യാവശ്യമാണെന്ന് വിദഗ്ധർ ഓർമ്മിപ്പിക്കുന്നു.

പഴയകാല മുറിവുകളെ തൊട്ടറിയാനും ചരിത്രപാഠങ്ങൾ ഉൾക്കൊള്ളാനും സഹായിക്കുന്ന ഈ യാത്രകൾ സഞ്ചാരികൾക്ക് പുതിയൊരു അനുഭവം തന്നെയാണ് സമ്മാനിക്കുന്നത്.

### Related Links & Sources
- [Original Story Source](https://truevisionnews.com/news/338550/dark-tourism-is-on-the-rise)